02 Meán Fómhair 2020

Breathnaigh ar an eisiúint: Suirbhé ar Ioncam agus Dálaí Maireachtála (SILC) 2019: Díothacht Fhorghníomhach [en]

Tá torthaí foilsithe ag an bPríomh-Oifig Staidrimh inniu (02 Meán Fómhair 2020) ar réimse na díothachta forghníomhaí ón Suirbhé ar Ioncam agus Dálaí Maireachtála (SILC) 2019 agus sonraí inchomparáide blianta roimhe sin.

Déanann Eva O’Regan, Staitisteoir, trácht ar na torthaí: “Is é an suirbhé SILC a chuirtear ar líonta tí an foinse oifigiúil sonraí ar ioncam an líon tí agus ioncam aonair. Ina theannta sin, is as an SILC a soláthraítear roinnt táscairí lárnacha náisiúnta i leith na bochtaineachta, amhail an ráta i mbaol bochtaineachta, an ráta díothachta forghníomhaí agus an ráta bochtaineachta comhsheasmhaí. Is iad torthaí na bliana 2019 maidir le díothacht fhorghníomhach atá á fhoilsiú againn inniu.

Sainítear líon tí a bheith i ndíothacht fhorghníomhach mura bhfuil sé ar acmhainn ag baill an líon tí íoc as dhá bhunriachtnais nó níos mó, mar shampla an áit chónaithe a choinneáil sách teolaí nó bronntanais a cheannach do ghaolta nó cairde ar a laghad uair sa bhliain. In 2019, áirítear 17.8% den daonra a bheith i ndíothacht fhorghníomhach, méadú ar an sciar 15.1% den daonra in 2018.

Ar na pointí is suntasaí ó thorthaí 2019, tháinig méadú ar rátaí díothachta forghníomhaí i measc móramh na ngrúpaí soch-déimeagrafacha le hais 2018. Ar an grúpa is mó athrú bhí daoine i gcóiríocht ar cíos - sciar 34.4% díobh seo a bhí ag maireachtáil i ndíothacht fhorghníomhach in 2019 le hais 27.4% in 2018. Ba bheag an méadú bliain ar bhliain ar ráta díothachta i measc daoine i gcóiríocht úinéir áitithe, 10.3% a taifeadadh in 2019 le hais 10.0% in 2018.

Maidir le comhdhéanamh líon tí, ba choitianta díothacht fhorghníomhach a bheith ag líonta tí ina raibh duine fásta amháin agus páiste nó páistí faoi 18 mbliana, ráta 45.4% in 2019. Bhí rátaí arda i gceist chomh maith i measc daoine aonair dífhostaithe, ar 36.0%, agus daoine aonair gan a bheith ag obair de bharr tinnis nó míchumais bhuain, ar 43.3%.

Feictear na ráta díothachta forghníomhaí is ísle le haghaidh 2019 i measc daoine a bhí scortha ón obair, ar 9.4%, agus líonta tí ina raibh triúr nó níos mó ag obair, ar 7.4%. Ó thaobh oideachais de, bhí ráta sách íseal i measc daoine le céim tríú leibhéal nó cáilíocht níos airde, ar 5.3%.

Maidir leis na cineálacha díothachta forghníomhaí is mó a chur isteach ar líonta tí an Stáit, ní raibh sé ar acmhainn ag cuid acu: troscán seanchaite a athrú (18.1%); bualadh le gaolta nó cairde do bhéile nó deoch uair sa mhí (13.6%); maidin, tráthnóna nó oíche amach sa choicís roimh an tsuirbhé (11.7%).

In 2019, bhraith triúr as deichniúr duine, nó 29.6% le bheith beacht, ceann amháin nó níos mó de na 11 cineál díothachta a thomhaistear. Bhí seo gar go leor d’fhigiúr na bliana roimhe, 29.1%, agus i bhfad níos lú ná an sciar is airde taifeadta, 44.9% sa bhliain 2013."

-- CRÍOCH --